Ստորագրվել են հուշագրեր

Վարչապետ Տիգրան Սարգսյանի գլխավորությամբ օրերս կառավարությունում տեղի է ունեցել ՀՀ վարչապետին կից արդյունաբերական խորհրդի հերթական նիստը՝ պետական գերատեսչությունների ղեկավարների, մասնավոր հատվածի, ինչպես նաև խորհրդարանական ուժերի ներկայացուցիչների մասնակցությամբ:

Նիստի ընթացքում անդրադարձ է կատարվել կոնյակագործության, դեղագործության ու կենսատեխնոլոգիաների բնագավառներում 2012-2015 թվականների գործողությունների ծրագրի նախագծերին և Հայաստանի գինեգործության ոլորտային ռազմավարության մշակման ընթացքին:

Այնուհետև, վարչապետ Տիգրան Սարգսյանի ներկայությամբ ՀՀ կառավարության և դեղագործության ու կենսատեխնոլոգիաների, ինչպես նաև կոնյակագործության ոլորտների ներկայացուցիչների միջև ստորագրվել են այս բնագավառների ռազմավարությունների իրականացման վերաբերյալ հուշագրեր, որոնք ծրագրերի իրականացման շրջանակներում ամրագրում են փոխադարձ պարտավորություններն ու գործողությունները: Կառավարության անունից հուշագրեր են ստորագրել ՀՀ առողջապահության նախարար Հարություն Քուշկյանը, ՀՀ էկոնոմիկայի նախարար Տիգրան Դավթյանը, ՀՀ գյուղատնտեսության նախարար Սերգո Կարապետյանը:

Հուշագրերի իրականացման նպատակն է՝ այս ոլորտներում ապահովել արտադրության և արտահանման ծավալների կայուն աճ, արտահանման շուկաների դիվերսիֆիկացիա, հայկական արտադրանքի որակի և միջազգային մրցունակության բարձրացում, աշխատատեղերի պահպանում և նոր աշխատատեղերի ստեղծում։

Հարցեր, պատասխաններ, մեկնաբանություններ